.

Jahresbericht 2016 - 2017

36  Mitglieder konnte die Präsidentin Veronika Jordi an der diesjährigen Hauptversammlung
vom 15. März 2017 begrüssen.

Üsersch Vereinsjohr isch wiederum sehr abwächsligsriich gsi.

Scho churz nach üsere Houptversammlig heimer mit dr Chinderware-Börse gstartet. Äs het wiederum vieli Sache gha. Äs het Chleider und Schueh i de verschiedene Grössine gha. Ou Spiusache und Büecher hets zur Uuswau gha. Leider isch der erhoffti Chöifer ufmarsch usbliebe. Äs si nume wenigi Bsuecher cho. Schad, füre Ufwand, wo d`Verchöifer und ou mir vom Vorstang gha hei.

Am 14. April isch Delegierte Versammlig vom Bernische Landfroueverband in Aarwange gsi. Ou vo Gumiswiu hei äs paar Froue teil gno.

S`wichtigschte isch gsi, äs nöis Vorstandsmitglied zwähle. Us zwöine Kanditatinne isch Doris Marti us Lyss gwäut worde.

Ou isch orientiert worde, dass d´Landfrouezytig uf ändi Johr igschtöut wird. Nöi gites drü mou im Johr ä Online-Usgab vor Zytig. Me chase uf dr Homepage vom VBL go noche läse. Gägenes entgäud vo Fr.15.- chamese ou uf Papier bschtöue.

Im Mai isch dr Maibummu agschtange. S`Ziu isch d`Chaschtele in Alberswil gsi. Nachdäm es am Nomitag no wie us Chüble gschüttet het, hetes du am Obe ufto, und äs hei sech äs paar wenegi Froue ufe Wäg gmacht. Uf dr Chaschtele isch dr Turm leider scho gschlosse gsi. So hei sie sich grad

wieder ufe Rückwäg gmacht und hei dr Obe bime feine Ässe ir Sunne Zell loh usklinge.

Afangs Juni isch d`Seniore-Reis planet gsi. Mir hei üs ufem Chileplatz troffe, und hei üs mit em Reist-Car ufe Wäg gmacht. Üsers erschte Ziel isch d`Horbealp gsi, wo mir äs feins Mittagässe gserviert hei übercho. S`Dessärt het es chli spöter in Tonis Zoo in Rothenburg gäh. Nacheme guet Stück Schwarzwäuderturte, heimer no ä chline Rundgang düre Zoo gmacht, womere vili exotischi Tier hei chönne bestuune. Gli isches wieder ufe Heiwäg gange, womer am früeche Obe wieder zGumiswiu si acho.

Am 15. Juni isch d`Wärchusstellig vor Schueu gsi, und somit ou üsi Kafistube. Die beleite Brötli und die feine Turte, hei riessende Absatz gfunge. Scho churz nach de achte, heimer aui 860 Brötli verchouft gha. Ou Die 18 Turte heimer räschtlos verchouft. Derzue chöme no 60 Crèmeschnitte und Cornets, wo ou aui si verchouft worde.

Da mir hürigs Johr s`Winterprogramm scho afangs Juli gmacht hei, heimer du ou chli Ferie vom Verein gha.

Ändi Septämber isches scho mit em Winterprogramm los gange.

Dr Tierarzt Dr. Alfons Knüsel us Dagmersellen het, organisiert vor Apothek in Zell, über d`Homöopathie im Chuestau gredt.

Ou im Herbscht heimer wieder ä Chinderwaren-Börse dürgfüehrt, mit em gliche Resultat, wie im Früehlig. –Zweni Chöifer!!!

D`Betriebsbesichtigung het üs zur Firma Oswald in Steinhausen gfüehrt. Ä stattlechi Chuppele Froue hei sich ufem Chileplatz troffe und dr Sommer Car het üs sicher uf Meisterschwanden is Restaurant Delphin zumene feine Mittagässe gfüehrt. Nachhär isches zügig uf Steinhuse gange. Bimene Dessärt und Kafi hetes zerscht ä Ifüehrig gäh. Ufeme intressante Rundgang dürs Labor und Produktion heimer der ganz Ablouf glehrt chenne. Vor planig bis zum endgültige Produkt isch ä länge Wäg, bises bi üs ir Chuchi landet. Im Lager hei mer ou no chönne luege, wie der Versand funktioniert.

Zletscht heimer no im Fabriklädeli die verschiedene Suppe, Saucen,Tees und was es süsch no aues git , chönne ichoufe.

Vou bepackt hei mir üs wieder ufe Heiwäg gmacht.

Lust und Frust mit de Huusufgabe, isch ä witere Vortrag gsi. D`Frou Erni us Ruswil het erklärt, wie Huusufgabe ou chöi Spass mache und me nid nume Stress het, mitne.

Äs witers Agebot isch für üser Ching gsi. D`Andrea Sommer und d`Susanne Wüthrich hei mit de Ching Wiehnachtsgschänkli baschtlet.

Üser Sammlifroue si ou ungerwägs gsi. Si hei für üsi Wiehnachtsbescherig für d`Seniore gsammlet. Schliesslich hei mir Gschänk brucht, für 63 Froue und Manne.

D`Wiehnachtsbelüchtig heimer ou i däm Johr zäme mitem Ortsverein abrocht.

Am Wiehnachtsmärit z`Huttu hei wieder äs paar Froue d`Landfroue vo Huttu bim Wiehnachts-Chrömli bache ungerstützt.

Ir Adventszyt heimer wiederum sehr schöni und persönlich gschtauteti Fäischter chönne bestuune. Jedes isch i sire Art einzigartig und schön gsi. Ou der Froueverein het sich miteme Fänschter beteiliget.

Im neue Johr isch aus erschts dr Spiu-und Jassnomitag agschtange. Äs isch ä luschtige und ungerhautsame Nomitag gsi, wo mit Kafi und Chueche isch abgrundet worde.

Am 24.jänner hei sich 14 Froue ufe Wäg nach Kleindietwil gmacht und hei sich id Gheimnis vor asiatische Chuchi loh iweihe. Äs isch ä lehr- und abwächsligsriche Chochkurs gsi.

Dr Filmobe isch i däm Johr einisch chli angers gs. Da mir keiner witeri Flime us üsem Dorf gfunge hei, heimer üs a Filmer Marc Suter erinneret. Är het vor Johre Filme drähit, wo ou Schouspieler us üsem Dorf mitgmacht hei. Bim obligatorische Apero und intressante Gschpräch, hei mir dä ungerhautsami Obe lo usklinge.

Am 7. Februar hei mir üs wieder ufem Chileplatz troffe. Üsers Ziel ischs Bundeshuus gsi. Ou äs paar Manne hei üs begleitet. Mitere schöne Fahrt dürs Ämmitau, simer zerscht mit em Reischt Car uf Rüeggisberg zum Mittagässe glangt. Nachhär isches zügig uf Bärn is Bundeshus gange. Nachdäm aui d`Sicherheitskontrolle passiert hei, heimer ä intressanti Füehrig dür das imposante Bouwärch gha. Mir hei gseh, wo dr Regierigsrat, dr Nationalrat und dr Bundesrat üsers Land regiere. Ou viu intressants übere Bou vom Regierigs-Gebäude hei mir erfahre.

Dr Vortrag über Rheuma und Arthrose het der Herr Philipp Meyer, vor Dropa Drogerie in Langenthal ghaute. Äs isch ä wit verbreiteti Chrankheit i üsere Zivlisation, wo üs aui cha preiche. Herr Meyer het üs erklärt, weli Möglichkeite dass es git, zur behandlig vo dere Chrankheit und weli Rolle d`Ernährig derbi spielt.

Am 22.Februar heimer d`Mäuchnouer Landfroue zu üs uf Gumiswiu zur Stubete iglade. Trotz schönschtem Früehligswätter si ä grossi zau Froue zu üs cho.

D`Brigitte Zaugg, ä Cousine vom Hedi Broch, het usem Läbe vo ihrem Vater aus Verdingching, usem Buech, wo ihre Vater Albrecht Zaugg gschriebe het, vorgläse. Ä idrücklechi Gschicht, wo eim so richtig igfahre isch. Schlimm, dass so öppis früecher überhoupt het chönne passiere und das ztuusige wiis.

Nach dere schwäre Choscht, heimer üsers obligatorische Zvieri, Ankebock mit feiner Züpfe vom Nyfeler Lisi ignoh und heinis bi agrete Diskussionen no chli ustuschet.

Aus letschte Kurs vor der HV isch no Oschterhase und Hüehner baschtle uf em Programm gschtange. Äs si luschtegi Gipshüehner und Oschterhase ufeme Holzschit entschtange.

Ou i däm Johr heimer etlechi Sitzige gha, dass mir üse Verein guet dürs Johr hei chönne füehre.

.

Copyright © 2017