.

Jahresbericht der Präsidentin 2017-2018

Ou das Johr isch sehr abwächsligsrich gsi.

Scho gli nach üsere Houptversammlig heimer wieder d`Chinderware-Börse düregfüehrt. Mir hei das Johr s`erschte mou der Verchouf scho am morge gschtartet. Äs het sich aus guet erwise, denn der morge isch besser glüffe, aus der Verchouf am Nomitag.

Da üser Kurse usem Winterprogramm no nid ganz fertig si gsi, hani do no d`Brichte vom Räschte.

Füürsüüle us Metau härsteue. Da dra hei sich einigi Froue und ou Manne gwagt. Äs si herrlechi Kunschtwärch entstange, wo jedes ihri eigete Idee het chönne ibringe.

Aus letschte Kurs isch no s`Tipizäut nähie dranne gsi. Ou dert si wunderbari Wärch entstange. Vilicht gseht dir hie und do chlini Indianer i ihrne Tipizäut.

A üsere erschte Sitzig hei mir üsi zwöi neue Vorstandsfroue chönne begrüesse. D`Sandra und d`Beatrix hei sich guet i üsem Vorstand integriert. Mir hei scho wieder afo plane, was mir im nöchschte Winter für Kürs wei abiete.

Am 11. April isch Delegierteversammlig vom BLV gsi. Ä zwöier Delegation het a dere Tagig teilgnoh.

Im Mai isch üse obligatorisch Maibummu agschtange. Är het üs uf Riedtwil a Mutzbachfau gfüehrt. Spöter hets im Rest. Kreuz in Obersteckholz no äs gmüetlichs zämesi gäh.

Scho am 30. Mai isch d`Seniorereis ufem Programm gsi. Leider si i däm Johr nid so viu Seniore derbi gsi. Mir hei aui i eim Car vor Sommer AG platz gha. So simer mitem zwöistöckige Car gschtartet. Am Passwang ir Heilig Bluet Kapäue het dr Pfarrer Tanner ä chlini Andacht ghautet. Nachhär isches zügig uf Münchestei is Rest. Seegarten gange, wos äs feins Mittagässe gäh het. Nachhär hei mir üs im Park vor ehemalige „Grüen80“ no chli chönne verwiele. Am spötere Nomitag hei mir üs wieder ufe Heiwäg gmacht.

Am 21. Juni isch wiederum Kafistube im zämehang mit dr Wärchusstellig vor Schueu agschtange. Fliessegi Häng hei ou i däm Johr Hunderti vo beleite Brötli gschmiert und beleit. Zäme mit de Turte, Crèmeschnitte, Cornets und Muffins hei si riessende Absatz gfunge.

Düre Summer düre heimer ou chli Ferie gha, was mir sehr gnosse hei. Im Ouguscht hei mir üs mit de Manne und de Ching bim Thesi zum brötle troffe. Isch ä gueti Abwächslig und ä schöne Nomitaggsi.

Ir zwöite Höufti vom Ouguscht isch bereits wieder üsers nöie Winterprogramm erschine. Bis am 2. Septämber si zaurichi Amäudige für die verschiedene Kurse igange.

Scho im Septämber het dr erscht Kurs statt gfunge. Kreativs us Beton isch entstange.

Bim Trampolin-Swinging Emotions hei sich d`Froue chönne glänkschonend fit mache.

Am 1. Novämber hei mir ä füehrig im Fernsehstudio in Leutschenbach, Zürich gha, wo ou d`Manne hei dörfe mitcho. Ä intressante Iblick is schaffe vo de Fernsehlüt isches gsi.

Ou für D`Ching isch öppis derbi gsi. Unger aleitig vor Andrea Sommer und ar Susanne Wüthrich si luschtegi Voguhüsli entstange.

Bim Vortrag über Burnout hei mir erfahre, was me cha mache, wenn öpper ufenes Burnout zuestüüret.

D`Wiehnachtsbelüchtig hei mir wiederum zäme mit em Ortsverein agmacht. Äs gseht gäng wieder schön us, wenn sie dobe isch.

Am Wiehnachtsmärit z`Huttu hei ou i däm Johr äs paar Froue. d`Landfroue vo Huttu bim Wiehnachts-Chrömli bache ungerstützt.

D`Sammufroue si ou wieder fliessig gsi, so dass mir üsne betagte Mitbürger äs chlises Wiehnachtsgchänkli hei chönne verbi bringe.

D`Adväntsfiir hei leider nume äs paar wenigi Froue bsuecht. Schad! I weiss nid obs am Wätter gläge isch oder eifach s`Innträssi nid do isch.

Dr Jänner het mit eme Kurs für üsi Manne agfange. Mit Chöttisagine si schöni Kunschtwärch us Houz entschtange.

Ou dr Jass-und Spiunomittag het nid gfäuht. Sisch ä luschtige Nomitag gsi.

Kunschtvoui Charte si bime witere Kurs entschtange.

Bi üsem scho fascht obligatorisch Fiumobe hei mir wiederum ä Fium vom Mark Suter chönne luege. Ä schöne und ungerhautsame Fium, wo vieli Darsteuer us Gumiswiu hei mitgmacht. Bime Apèro und intressante Gschpräch hei mir dr Obe loh usklinge.

Am 21. Februar si mir bi de Mäuchnouer Landfroue iglade gsi. Äs chlis tschüppeli Froue het sich ufe Wäg is Chilegmeinshuus uf Mäuchnou gmacht. Si hei üs ufene Reis dür Lappland mitgnoh. Ä intressanti und spannendi Reis, und für üs ä unbekannti Gägend. Nachem Schätzwettbewerb, wo d`Froue hei müesse errote, wievieli Korkzäpfe imene übergrosse Wyglas platz hei,si mir zum traditionelle Zvieri, bi Züpfe, Ankebock und Miuchgaffe überegange. Mit agregte Gschpräch isch dä schön Nomitag im Flug vergange.

Dr letscht Kurs vor dr HV isch dr Shabby chic Kurs gsi. Schöni Spruchtafele und Holztafele mit verzierte Büchse si enstange.

Natürlech hei mir ou wieder bi verschiedene Geburtstage chönne goh gratuliere, was gäng wieder ä schöni Ufgab isch.

Im Früehlig göh mir ou gäng zu üsne Lüüt, wo i de verschiedene Senioreheim si, goh bsueche, was ou gäng ä schöni Sach isch.

Mit etliche Sitzige hei mir üsers Vereinsschiffli, dürnes, zum Teil ou chli stürmisches Johr, brocht.

 

Copyright © CSL-Tools