.

Jahresbericht der Präsidentin 2018-2019

Im Johr 2018 hets viu Schöns, aber leider ou Truurigs gäh.


Gschtartet heimer üsers Vereinsjohr mit üsere Kinderwarenbörse. Leider isches ou üsi letschti gsi. Äs het sich eifach nid rentiert. So hei mir schwärem Härze entschiede, üsi Börse nümme witerzfüehre. Äs isch schad, aber der Ufwand und der Ertrag si i keim Verhältnis gschtange.

Bi üsere erschte Vorstandssitzig hei mir üsers neue Mitglied, Andrea Sommer härzlich wiukomme gheisse.

Mir hei üsers neue Vereinsjohr afoh plane.

Ändi Apriu isch no dr letscht Kurs vo üsem Winterprogramm gsi. Dr Grillkurs bir Metzgerei Schlüechter in Dürrenroth isch guet bsuecht gsi. Schön isch gsi, dass sich ou Manne derfür intressiert hei. Mir hei sehr viu übers Fleisch und die verschiedene Grill arte vernoh und hei ou sehr viu chönne probiere. Vom Apéro über Vorspies und Houptgang bis zum Dessärt hetes aues gäh. Äs isch ä glungne Obe gsi.

Dr Maibummu het üs i däm Johr uf Mäuchnou ufe Schlossbärg gfüehrt. Ufeme intressante Rundweg het me die verschiedenschte Kunschtwärch chönne bewundere. Bim anschliessende Znüni het me dä schön Obe lo usklinge.

D`Seniorereis afangs Juni het üs id Lenk gfüehrt. Ä stattlechi Anzau Seniore und Seniorinne si mit em zwöistöckige Car vor Firma Sommer, Grüenematt gägem Oberland zu gfahre. Ir Lenk im Hotel Chrütz hets äs feins Mittagässe gäh. D`Rückreis het üs übere Jaunpass is Friburgische und de wieder gäge heizue gfüehrt.
D`Kafistube alässlich vor Wärchussteuig vor Schueu isch ou i däm Johr ä voue Erfoug gsi. Do hei mir s`erschte mou üser neue T-Shirts chönne träge. Etlechi hundert beleiti Brötli einigi Turte, Cremeschnitte und Cornets hei dankbari Abnähmer gfunge. Vile Dank aune Häufer.

A dr Letschte Sitzig vor de Ferie hei mir scho wieder s`Winterprogramm fertig planet.
Düre Summer hei mirs ä chli Ruehiger chönne näh. Mir hei die Zyt gnosse.
Scho gli im Herbscht isches los gange mit de erschte vorbereitige für d`Gwärbustellig GOGA. Mir hei ä Stand wo mir wei früschi Waffle mache. Äbefaus verchoufe mir abpackti Brätzeli, Schlüfferli und ou Waffle. Mir hei Froue gsuecht, wo üs die bachet und verpackt hei. Am 5. Oktober isches de sowit gsi. GOGA isch eröffnet worde. Mir hei bis am 7. Oktober üser vorbereitet Bachware räschtlos verchouft gha. Äs het 62 Säckli Brätzeli, 62 Säckli Schlüferli und 107 Säckli Waffle verchouft. Derzue heimer no 25 mou s`Wafflerezäpt Teig gha für früschi Waffle diräkt am Stang zmache.
Zum Glück gites gäng wieder Froue, wo üs hiufrich zur Site stöh. Ou dene äs härzlichs Dankeschön.
Afangs November si mir mit de Manne uf Brunne go d`Victorinox besichtige. Äs isch intressant gsi, zgseh, wie so äs Sackmesser entsteit. Bimene feine Mittagässe und agregte Gschpräch isch Zyt wie im Flug vergange. Nacheme churze bsuech am See, wo der Föhn stürmisch blose het, hei mir üs wieder ufe Heiwäg gmacht.
Mitti November isch wieder der Tag der Pausenmilch gsi. Mir hei a de Chindergärteler und de Schüeler Miuch mit Aroma usgschänkt und ne Späckzüpfe verteilt.
Sammufroue si ou wieder ungerwägs gsi, damit mir üsne Seniore äs chlises Wiehnachts-Gschänk hei chönne bringe.
Vor em erschte Advänt hei mir wieder zäme mit em Ortsverein d'Tanneboum- und Wiehnachtsbelüchtig abrocht.
Im Dezämber hei mir im däm Johr wiederum verschiedeni Adventsfeischter chönne goh aluege. Ou dr Froueverein het im Gmeindshuus eis gha. Äs isch guet bsuecht worde.
I verschiedene Kurse hei mir ou i däm Winter chönne üsi kreativität unger bewiis steue.
Agfange hets mitere Informationsveranstautig zäme mit dr Schueu über Mobbing i der Schueu.
Mit säuber gsammlete Steine äs Härz- oder ä Spiralskulptur härsteue isch der erscht Kurs gsi.
D`Ching hei chönne schöni Windlicht-Eule oder Vogufueterhüsli töpfere. Sie hei sehr viu Spass gha do derbi.

Weihnachtliche Floristik isch ä witere Kurs gsi. Im il fiore in Rohrbach hei d`Froue schöni Gschteck härgschteut.

Im Januar het dr obligatorisch Jass- und Spielnomitag statt gfunge. Ä luschtige Nomitag mit jasse, lafere, Chueche und Kafi isches gsi.
Für d`Fitness isch s'Beckebode-und Haltigstraining gsi.
Bim Kröndlizauber isch wiederum Kreativität gfrogt gsi.
Die Wichtel sind los. So het dr nöchscht Kurs gheisse. So hetes jetz in Gumis vili chlini Wichteli us Filz.
Ou s`Höuzige isch nid zchurz cho. Ä Früchteschale hei die Froue härgschtöut.
Dr Fiumobe het ou i däm Johr nid gfäut. I däm Johr isch sogar der Filmmacher persönlich awäsend gsi. Dr Chrigu fahrt ab, so het dä Fium gheisse. Äs isch sehr idrücklich gsi, zgseh, unger weune umständ dä Chrigu het müesse zschlag cho, und schlussändlich gnue het gha vo der ganze Sach. Ou s`Apèro het nid gfäut.
D`Jubiläumsstubete mit de Mäuchnouer Landfroue isch dr Höhepunkt gsi. Dr Froueverein wird i däm Johr hundertjährig. Das isch Grund gnue gsi, das ä chli zfiire. Mir hei derzue no Delegatione vor Gmein, Chilegmein, vom OLV und vo de Landfroue Huttu iglade. Zur Ungerhautig isch Theresia Bolliger zueständig gsi. Sie het gsunge und Witze verzöut. Bimene feine Zobe mit Hamme, Härdöpfusalat, Züpfe und eme Gläsli Wy, zum Dessert Schwarzwälderturte und Kafi und agregte Gschpräch hei mir ä schöni Geburtstagsfiir gha.

D`Landfroue vo Reisiswiu hei afangs Februar zur Delegierte Versammlig vom OLV iglade. Uf der teufverschneite Howacht hei si mit der Dekoration glich chli Frühelig häre zouberet.

D`Gschäft si speditiv über Bühni gange. Nach em feine Zmittag hei nis zwe Herre vom Natur- und Vogelverein Wase ä Vortrag über die verschiedene Schwaubearte gha.
Z`erwähne wär no, dass ou d`Bsuecherfroue wieder üser Alleinstehende, Chranke und i de Heim wohnende Froue und Manne si go bsueche.

Mir hei ou wieder dörfe go zum Geburtstag gratuliere. Das isch gäng ä schöni und dankbari Ufgab.

Äs intressants und aktivs Vereinsjohr isches gsi.

I danke aune, wo öppis derzue bitreit hei, und hoffe, dass dir ou im nöchschte Johr derbi sit.
Nume so chöi mir die nöchschte hundert Johr i agriff näh.

Copyright © CSL-Tools