.

Jahresbericht 2019-2020

Scho churz nach üserer HV hei mir die erschti Sitzig mit nöier Bsetzig gha. Mir hei aus erschts d`Kreise und d`Ressorts verteilt. Mir hei aber ou scho grad wieder afo plane, was mir im neue Vereinsjohr aus wei ungernäh.
 

Am 9. April hei vier Froue ar Delegierte Versammlig vom VBL teilgnoh. Dert isch d`Christine Gafafer vo de Landfroue Mäuchnou nöi i Vorstand gwäut worde. Am Nomittag hets no äs intressants Reverat vore ehemalige Ärztin usem Insuspitau gä. Sie het verzeut, wie sie und angeri Ärztinne diskriminiert worde sei.
 

Am 16. Mai hei sich 18 Froue ufe Maibummu gmacht. Ihres Ziel isch s`Naturschutzgebiet in Ettiswil gsi. Nachere churze Wanderig hei sie  ufem Heiwäg im Rest. Ilge no äs feins Znüni zue sich gnoh.
 

De Modeapèro im Wase bim Lüthi Look isch ä sehr abwächsligsriche Obe gsi. Die verschiedene Models us üsne Reihe hei sich sehr guet präsendiert.
 

Am 4. Juni isch der Sommercar bi strahlendem Wätter ufem Chileplatz vorgfahre. Ä luschtegi Schar Seniore, Verträter vor Gmeind und Chilegmeind und mir vom Vorstand hei sich igfunge um ä gmeinsami Reis a Ägerisee zmache. Ir Vitus Chile in Morgarte het Pfarrer Achim Wollmershäuser ä chlini Andacht ghaute.
 

Anschliessend hei einigi ä churze Spaziergang zum Rest. Eierhals gmacht. Die angere si mit em Car zum Restaurant

gfahre, wos äs feins Mittagässe gäh het. Nach agregte Gschpräch hei mir üs wieder ufe Heiwäg gmacht.
 

Guet gluunet und ohni Zwüschefäu si mir wieder deheime acho. Ar Einwohnergmein und ar Chilegmeind danke mir no einisch, für die Grosszügegi Spänd a die Reis.
 

Am 19. Juni isch wiederum a de Schüeler ihri Wärchusstellig ufem Thermin gschtange. Mir hei ou i däm Johr dörfe Kafistube füehre. Di beleite Brötli, feine Turte, Spitzbuebe und Muffins hei ou i däm Johr ihri Abnähmer gfunge.
 

Ar letschte Vorstandssitzig vor de Summerferie hei mir üsers nöie Winterprogramm gschtautet.
 

Am 1. Auguscht het der Froueverein dörfe d`Feschtwirtschaft füehre. Bi schönschtem Wätter hei mir Schwiinssteak, Bratwürscht und Servelats grilliert und derzue Härdöpfusalat serviert. Mit Kafi und Chueche hei mir üsers Angebot erwiteret. Leider hets du öppe am öufi afo rägne und mir hei müesse zämepacke. Dr Obe isch für üs ä Erfoug gsi.
 

Bereits ändi Oktober isch üsers Kursprogramm gschtartet. Ä Workshop mit Blackroll Produkten für zlehre s`Bindegwärb zlöse und meh Beweglichkeit z`erlange und Energieblockade zlöse.
 

Der obligatorisch Pousemiuch-Tag hei mir ou i däm Johr düregfüehrt. Die aromatisierti Miuch und Späckzüpfe hei ihri Abnähmer gfunge.
 

Afangs November hei mir ä bsuech bi Andermatt Biocontroll in Grossdietwil gmacht. Mir hei viu Info über biologische

Pflanzeschutz,-Schädlingsbekämpfigs,-Dünge-und Tierarztmittu übercho.
 

Bim Töpfere hei d`Froue ihri Kreativität chönne unger Bewis steue. Äs si wunderschöni Sache entstange.
 

Bim Cherzezieh für Gross und Chli si wunderbari Cherze entstange.
 

Ou s`lisme isch i däm Winter nid zchurz cho. Einisch im Monet hei fliessegi Häng, Socke, Händsche ,Chappe und angeri Lismersache gmacht.
 

Ar Adväntsfiir hei d`Örgelimeitschi Joelle Chrischte und Larissa Ruch uf ihrne Schwizerörgeli gschpiut. D`Andrea het ä Wiehnachtsgschicht vorgläse und bimene feine Znüni isch der Obe usklunge.
 

Mit em Ortsverein hei mir ou hüür wieder üsi Wiehnachtsbelüchtig abrocht. D`Spiugruppe het no schöne Schmuck am Wiehnachtsboum agmacht.
 

Äs paar Froue hei wieder d`Landfroue vo Huttu am Wiehnachtsmärit bim bache vo ihrne Chrömli ungerstützt.
 

Üser Seniore si ou wieder ar Wiehnachte mit eme chline Gschänkli überrascht worde.
 

Im Jänner isch der Jass und Spiunomittag gsi. Jass freudegi Froue hei ä gmüetliche Nomittag gha.
 

Betriebsbesichtigung bir Stöckli Skimanufaktur isch leider usgfaue, si wird aber im nöchschte Winter nocheghout.
 

Füre Nachwuchs hets ä Schnupperkurs im Karate gäh. Sven Bänziger hetse i die Kunscht igfüehrt.
 

Bim Fiumobe hei mir Iblick is Läbe vo de Ching vom Napf übercho. Bim obligatorische Apèro und intressante Gschpräch isch ä gmüetliche Obe usklunge.
 

Bir Stubete bi de Mäuchnouer Landfroue hei mir ä Reis dür Indie gmacht. S`Schätzspiu, wo me het müesse Kafibohne imene Glas schätze, hei d`Mäuchnourt Froue aui Priise für sich babgrumt. Übrigens si 1237 Bohne im Glas gsi. Bim obligatorische Ankebock mit Züpfe und Miuchgaffee hei mir ä schöne Nomittag erläbt.
 

Der letscht Kurs vo däm Winter isch ir Hofstatt gsi. Drohtchugle füre Garte si entstange.
 

Dir gseht, mir hei äs intesivs und intressants Johr gha. Mit etliche Sitzige hei mir versuecht üsers Vereinsschiffli dürs Johr zstüüre.

Copyright © CSL-Tools